මහින්දානන්ද දවස් තුනකට කලින් අවුරුදු 20 ඇතුළට ගියා. පේන විදියට ශ්‍රේෂ්ඨාධීකරණයෙන් මහින්දානන්දගේ අභියාචනය විසික් කරොත් ,එයාගේ අන්තිම කාලේ කුරු ඇතුළෙම ගෙවෙයි.දැනට නම් අකුරු ගැළපිලා තියෙන විදියට මේක තමා මහින්දානන්දගේ තීරණේ.ඒකට නීතීමය හේතුව ත්‍රිපුද්ගල විනිසුරු මණ්ඩලයකින් තීරණය දුන්න නිසත් , අභියාචනාධිකරණයට නොයා කෙළින්ම ශ්‍රේෂ්ඨාධිකරණයේ ත්‍රිපුද්ගල හරි පංචපුද්ගල විනිසුරු මඬුල්ලක් ඉස්සරහා මේක නැවත අහන නිසාත් , දඬුවම අවුරුදු 20 ක් අයින් කරලා ගෙදර එවයි කියලා හිතන්න සෑහෙන අමාරුයි.අනික මහාධිකරණයෙන් වැරදිකරුවන් කරපු නිසා මහින්දානන්දට ඇපත් නෑ. බන්ධනාගාරයේ ඉදන්ම නඩුවට එන්න වෙන්නේ.
මහින්දානන්ද කියන්නේ ඉතින් අපේ ගමේ මිනිහා. නාවලපිටියේ මනුස්සයා. පස්සේ කාලෙක මම කොහේ හරි ගිහින් ගම නාවලපිටිය කීවම මගේ මිත්‍රයෝ ඇහූවේ
"මහින්දානන්ද උඹලගේ පැත්තේ නේද "
කියලා. කොටින්ම මහින්දානන්ද නම් නාවලපිටිය , නාවලපිටිය නම් මහින්දාන්ද වගේ ලයින් එකක් තිබ්බේ.
මට මහින්දානන්දව මුලින්ම හම්බෙන්නේ අනුරුද්ධේ තිබුන වසර අවසාන තෑගී ප්‍රධානෝත්සවයේ ආරාධිත අමුත්තා විදියට. ඒ නම මම මුලින්ම ඇහුවෙත් ඒ දවසේ. එදා ඉදන් පහුගිය මහමැතිවරණයෙන් මිනිහා පැරදෙන කන් නානාප්‍රකාර තැන්වල මම මිනිහව දැකලා තියනවා.ඒ හැමතැනකම මහින්දානන්ද වටේ හෙංචයියෝ රැළක් හිටියා. මළගෙදර , දානේ ගෙදර, අරකේ මේකේ කොහේ ගියත් ඒ හෙංචයියෝ "අපේ ඇමතිතුමා "කියලා දංකුඩ කකා හිටියා.
මහින්දානන්දගේ මේ කුක්කෝ සෙට් එක මාර්කට් එකේ ඉදන් කඩේ පොළේ හැමතැනම තමන්ගේ ප්‍රමාණයෙන් බලය විහිදවගෙන හිටියා. මාර්කට් එක හදනකොට එතනින් කඩ ප්‍රමාණයක් , සාප්පූ සංකීර්ණයක් හදනකොට එතනින් සාප්පු දෙකක් තුනක් , ක්‍රීඩාංගණයක් හදනකොට ක්‍රීඩා භාණ්ඩ අලෙවි වෙළඳ සැලක් , බාර් පර්මිට් එකක් , සතොස සභාපතිකමක් , කන්ස්ට්‍රක්ෂන් ප්‍රොජෙක්ට් එකක් , හොටෙල් එකක් ඒ මොකුත් නැත්නම් ත්‍රී වීලර් පාර්ක් එකක ස්ලොට් එකක් හරි මහින්දානන්ද එයාගේ තග් ගෝලයන්ට බෙදුවා. ඒ කාපූ කෑමට කෘතගුණ විදියට නාවලපිටියේ අයියලා මහින්දානන්ද එක දිගට අවුරුදු විස්සක් උඩම උස්සලා තිබ්බා. හැමදාම පාර්ලිමේන්තු එව්වා. වෙන එකෙක්ට දේශපාලනය කරන්න තියා අන් මතයක් දරන්න බැරි තැනට නාවලපිටිය පත් කරා. බලය ,ප්‍රචණ්ඩත්වය ,මැර බලය මැදින් මහින්දානන්ද ඉන්ද්‍රඛීලයක් වගේ නොනැසී කාලාන්තරයක් හිටියා.
මහින්දානන්දත් ,2005 චන්ද්‍රිකාගෙන් ගැළවිලා රාජපක්ෂගේ ඔඩක්කුවට පැනලා ගත කරපූ ජනාධිපති වාර දෙකේදිම ආණ්ඩූවේ ලොකුම සයිස් ඇමති උනා.විදුලි බල , ක්‍රීඩා ,කෘෂිකර්ම වගේ බරපතළම අමාත්‍යයංශ ටිකක් එයා කරා. ඒ ඉන්නකන් නාවලපිටියේ එයාගේ ගෝල බාලයන්ගෙන් මිනිස්ට්‍රීස් ඔක්කොම පිරෙව්වා. මම කියන්නේ බොරුවක් වගේ නම් ගිහින් බලන්න විදුලි බල මණ්ඩලයේ , ක්‍රීඩා අමාත්‍යංශයේ මෙලෝ කර්‍යභාරයක් නැතුව පිනට කකා පඩි ගන්න මහින්දානන්දගේ ගොට්ටෙක් නැද්ද කියලා.
කොහොමෙන් කොහොම හරි ගෝඨාභයගේ ආණ්ඩූවේ ,රාජපක්ෂ පවුලෙන් පිට ගෝඨාභය ගනුදෙනු කරපූ එකම ඇමති උනේ මහින්දානන්ද. ඒ ලෙවල් එකේ ඉදලා බන්ධනාගාරේ ප්‍රින්ටින් මැෂින් එකක් ඔපරේට් කරන්න වෙනවා කියන්නේ එක අතකින් ලංකාවේ Judiciary (අධිකරණය) එහෙම නැත්නම් නීතීය හා සාමයේ ආධිපත්‍ය තහවුරු වීම කියලා සාමාන්‍ය ජනතාවට සතුටු වෙන්න පුලුවන්. කාගේ කාලේ නඩුව දැම්මත් මේ ආණ්ඩුව නොහිටින්න මහින්දානන්ද මේ කපේට හිරේ යන්නේ නෑ කියලා සාමාන්‍ය බුද්ධියක් තියෙන මනුස්සයෙක්ට තේරෙන තර්කයක්.
වැදගත්ම දේ මාලිමාවට හෝ ජනාධිපති දිසානායකට බලයක් ලැබුනේ මහින්දානන්ද වගේ මිනිස්සූ ඇතුළට යවන්න විතරක් නෙවෙයි. මහින්දානන්දගේ සාම්පලේ දේශපාලන සංස්කෘතියම අවසන් කරන්න. මහින්දානන්දගේ නාවලපිටියේ උන්නූ දේශපාලන කුක්කන්ගේ නූගත් , අමන දේශපාලන භාවිතයට තිත තියන්න.ඒ එක්කම දේශපාලනේ ඉන්න , ඉඳපු සහ එන්න බලාපොරොත්තු වෙන්න ඉන්න ඕන කෙනෙක්ට ඇඟ හිරිවැටෙන තරමේ දඬුවමක් මේ ලැබුනේ. ශ්‍රේෂ්ඨාධිකරණයේ අභියාචනයට ලැබෙන තීරණය අනුව අපිට ඒ දඬුවමේ බරපතළ බව මැනගන්න පුලුවන් වෙයි. ඒත් මුල්‍යමය වංචා විශේෂයෙන්ම රාජ්‍ය දේපළ අවභාවිතයට කිසිම සමාවක් නැත කියන පණිවිඩය රාජ්‍ය සේවයටම යවාගන්න පුලුවන් උනා මේ නඩු තීන්දුවෙන්.
අවුරුදු විස්සක් !! දශක තුනක තරුණ ජිවිත , මහජන මුදල් නාස්ති කරපූ මහින්දානන්දට මේ අවුරුදු විස්ස ඇතුළෙන් ඒ කරපූ පව් ටික ගෙවාගන්න පුලුවන් වෙයි .ශ්‍රේෂ්ඨාධිකරණ තීන්දුවෙන් පස්සේ මේ ෆයිල් එකත් වහලා දාන්න ජනාධිපති දිසානායකට පුලුවෙන් වෙයි.
මනුජය තෙන්නකෝන්
2025-06-01
Comments
Post a Comment