තොටිල්ල පදවන හස්තය ....

 මෙය  මගේ වැඩිමහල් සහෝදර මිතුරියකගේ ඉල්ලීමකි. පහත් ඇමිණූ අකුරු සියල්ලක්ම ඇත්තේ  ඈට  නොකියූ ,ඈ කෙරෙහි මා සතු ගෞරවය පමණි.

පාසල් සමයේ කාලවර්ණිත කෙසඟ උසැති , මොළයේ අංශු මාත්‍ර යුවතියක් කිසිදිනක දෙවරක් හැරී නොබලනා අඟ පසගින් හෙඹි වූ මාගේ ආදරය යොමූ වූවේ එකල උන් සුන්දරම තරුණියට යි. එකල අප තරුණියක් සුන්දර යැයි අප තක්සේරු කළේ ඇගේ මුහුණේ ,සිනහවේ සහ නිකටේ සුන්දරත්වයෙන් පමණි. තරුණියක් සුන්දර විය යුත්තේ මුහුණෙන් පමණක් නොවන වග මට තේරුම් යෑමට සරසවියේ වසර දෙකක් ගතකිරීමට සිදු විය.

මෙසේ අවුරුදු විසිතුනක් පුරාවට මා හට යුවතියන් දෙදෙනකු පමණ ඉතා ආසන්නයෙන් ආශ්‍රය කිරීමට ලැබිනි.  වාද නොකරන්න. පැහැදිලිව ඔවුන් පෙම්වතියන් ය.  ඔවුන් දෙදෙනාම ඒ ඒ සමාජ ස්තරයන්ගෙන් පැමිණි යහපත් මිනිස්සූන් දෙදෙනෙකි.නමුත් , ඉන් සරසවිය තුළ මට හමුවු කාන්තා පෞරුෂය මා ඉතා ගරු කරන සහ මම ඉන් පෙර නොදුටු අයෙකි.එම  අවසානය කෙසේ වූවත් නැවත ඒ දෙස හැරී බැලු කලක ඒ සෑම මොහොතක්ම සුන්දර මතකයන් පමණක් බව මට තේරුම් ගත හැක .

ඉහතකී  සම්බන්ධතා දෙකෙහිම මා තේරුම් ගත් යම් පොදු තර්කනයක් ඇත. එනම් කාන්තාව යනු සුළුකොට හෝ සුළුවෙන් තක්සේරු කළ යුත්තක් නොවන වග.ඔවුන් සතුව විශාල විභවයක් ඇති අතර එය බාහිරින් ඔවුන් දෙස බැලුකල නොපෙනෙනු ඇත. නමුත් යම්තාක් දුරට ඔබ යුවතියක් හා සම්බන්ධය වූ කලක එය වඩාත් පැහැදිලිව ත්‍රීවුර වේ. මෙය සෑම කාන්තා සහෝදරියකටම  අදාළ ද යන්න මා නොදනි. නමුත් බහුතරය එලෙස යැයි මා උපකල්පනය කරමි. මෙයට මනා ලෙස ගැළපෙන උදාහරණය පහතින් දක්වමි. පසුගිය කාල  සමයේ  සමාජය කැළඹූ විවාදාත්මක  කාන්තා ඝාතනයේදි , එලෙසින් ගෙල අහිමි වූ සහෝදරියගේ කතාව තුළ පවා ඈ යම් ආකාරයකට එවන් පොලිස් ලොක්කකුට පවා පීඩනයක් ලබාදීමට තරම් සවිමත් වන්නට ඇති. එය එසේ නොවී ඈ මුළුගැන්වූ ,බියගුළු කාන්තාවක් නම් ඈ තවමත් ජිවත් විය යුතු නොවේ ද. පරිණාමයෙන් යම් ආකාරයකට කාන්තාවට ආරක්ෂාව සහ සැලකිලිමත් වීම පිළිබඳ හුරුවක් ලැබුන්ද තාක්ෂණික විප්ලවය සමඟ ඔවුන්ගේ ස්වාධීන අදහස් මත දැරීම වඩ වඩා වර්ධනය වුනි.එය බොහෝ විට කාර්මික විප්ලවය සමඟ සිදුවන්නනට ඇත. ඔබ Peaky blinders නැරඹු අයෙකු නම් , එකල බ්‍රිතාන්‍යය සමාජයේ කාන්තාවකට තීරණ ගැනිමට ඇති බලය තවදුරටත් ප්‍රශ්න නොකරනු ඇත. එය දේශපාලනිකව මුලින් වර්ධනය වූ අතර පසුව  එය සමාජීය ව්‍යාප්තියක් ලෙස ස්ථාවර විය.
"තොටිල්ල පදවන හස්තය ලොව ආණ්ඩූ කරවයි " මෙම උද්දෲතය බොහෝ තැනි හි භාවිතා වන්නේ ...
කාන්තාව සතු එම ස්වාධීනත්වය නිසාවෙනි.  ලෝක තත්වය එසේ පවතින කලක ලංකාව තුළද එහි සිඝ්‍ර වර්ධනයක් පෙනෙන්නට තිබිනි. සිරිමාවො බණ්ඩාරනායකගේ සිට ඔටාරා දක්වා පැමිණි කාන්තා පෞරුෂයන් එකී කතාවේ සාක්ෂිකරුවන් වනු ඇත. නමුත් මෙහි මා සඳහන් කළ යුතුම  නවමු චරිතය Asha de vos. සුන්දර ,ඍජු ඈ පසුගිය වසරේ ලොවට වඩාත්ම බලපෑමක් සිදුකළ හැකි කාන්තාවන් සියය අතර අයෙකි.ඈට සවන්දෙන්න . කාන්තාවකට යා හැකි දුර කොපමණ දැයි කාන්තා පිරිමි දෙපාර්ශවයටම  තේරුම් ගැනිමට හැකිවනු ඇත.  
ඔබ මෙන්ම මාද පය ගසා සිටිනා වර්ග අඩි හැටපන්දහසක කුඩා දිවයිනෙන් පිටත එවන් විස්කම් කරනා කාන්තාවක් දහසකි. ඔවුන් බොහෝමයක් ඔබ ඔය කියන්නාවූ විවේචනය කරන්නා වු  යල්පැන ගිය, පිළුනූ  වූ, යාවත්කාලීන නොවූ ගතානුගතික සිංහල සංස්කෘතියෙන් බිහිවූ මිනිස්සූන් ය. දැන් ලාංකීය   සහෝදරියන්  කල්පනා කළ යුත්තේ ( මගේ සහෝදරියද ඇතුළුව)  වඩා ගතානුගතික සංස්කෘතිය ද ,නැත්නම් ඔබද යන්නයි. මක්නිසාදයත් යත් සංස්කෘතිය යනු අපගේම සිතුවිලි සෙවණැල්ල බව අප කිසිදින  තේරුම් නොගැනීමයි.

තොලොස්තෝයිගේ The Kreutzer sonata හි කතා වස්තුවට අනුව  ගැහැණිය යනූ භාණ්ඩයකි . දහ නමවන සියවසෙදි පිරිමින් විසින්   උත්කර්ෂයට නැංවූ වෙළඳ භාණ්ඩයක් වන ගැහැණිය ,විසිඑක්වන සියවසෙ ස්වාධීන , සිවිල් බලයක් ඇති සමාජ ජිවියකු වී අවසන් ය. සෑබෑ සමාජ විප්ලවයන් යනු එවැනි ලිංගිකත්වය මත පදනම් නොවූ සමාජ ක්‍රමයක් ඇති කිරිමයි.

පෙර කී පරිද්දෙන් මෙරට හෝ එතෙර ප්‍රකට කාන්තා සිවිල් චරිත සියල්ලක්ම ප්‍රායෝගික බුද්ධියෙන් මුහුකූරා ගියාවු කාන්තාවන්‍ ය. ගැහැණුන්ගේ මොළේ කියනා තරමටම හැඳි මිටේ ප්‍රමාණිත නොවන බව මම පෞද්ගලිකව දනිමි.නමුත් ප්‍රායෝගික බුද්ධිය යනූ අකුරු රූප මත පදනම් වූ අධ්‍යනයක් නොව . එය සමාජ කියවීම මත පදනම් වූ අධ්‍යනයකි.

  " පොතක් පතක් කියවන, සිංදුවක් කවියක් අහන, වේදිකා නාට්‍යයක් ප්‍රවෘත්තියක් බලන ගැහැණියක් සොයාගන්නට "

එකල අපට බලකෙරුනේ එම ප්‍රායෝගික බුද්ධියේ අවශ්‍යයතාව නිසාවෙනි. සිහින ලෝකයෙන් බිමට බැස සැබෑ ලෝකයේ තම හිමිතැන ලබාගැනිමේ ප්‍රයත්නයට නම් කාන්තාව සම්බුද්ධික විය යුත්තේ ඒ නිසාවෙනි.

  සහෝදරියනි, සර්වබලධාරි දෙවියන් වහන්සේ ගේ මැවීමෙන් හෝ මහා බ්‍රාහ්මණයාගේ මැවීමෙන් හෝ මහා පිපිරුම් වාදයෙන් හටගත් පරිණාමවාදයේ පදනමෙන් හෝ ඔබ පිරිමින්ට වඩා ශාරීරකව දුර්වල වී ඇත. එයට ඔබට කල හැක්කක් නොමැත. සැබෑවකි. ශක්තියෙන් ඔබ පියවරක් පසුපසින් වන්නට ඇත.නමුත් අනෙක් සෑම ආකාරයකින්ම ඔබට ලිංගිකත්වය අමතක කොට තරග කළ හැක. එසේ තරග කරන්නා වූ ,අරගල කරන්නා වූ සමාජ ප්‍රගමනයට වෙහෙසෙන්නා වූ  කාන්තා සහෝදරියන් රැසක් තවමත් සටන් බිමේ සටන් කරන්නේ ය .ඔවුන් බහුජාතික සමාගමක  අධ්‍යක්ෂක මණ්ඩලයක මුල් පුටුවේ සිට බියගම කර්මාන්තශාලාවක ජුකී මැෂින් කරකවන තැන දක්වා පැතිරී තිබේ. ඔවුන් සියල්ලක්ම ගතානුගතිකත්වයට අභියෝග කරන්නා වූ නූතනවාදයේ ආලෝකමත් මිනිසුන් ය.

දසමසක් පුරාවට ජිවයක උපතේ හිමිකරුවන් වන සහෝදරියනි. ඔබගේ ගමනාන්තය ටික් ටොක් තිරයක්ද , මුළුතැන්ගෙයි පුටුවක් ද  එසේ නොවේනම් ඔබ දුටු  සිහින හඹා යන ගමනක්ද යන්න ඔබම තීරණය කරන්න.
නවීන ලෝකය යනූ තවදුරටත් බෝක්කූ මත සිට විසිල් වැදුනු යුගයක් නොව...සිහින මත ඇවිද යන්න එවිට ඇසෙනා විසිල්  හඬ පෙර මෙන් කටුක නොවනු ඇත.