දුර්මත දුරුකරමු.

 මාලිමා රජය විසින් ගෙන ආ Penal Code (Amendment) පිළිබඳ ගුරුවරු කිහිපදෙනෙක් තමන්ගේ අප්‍රසාදය මුහුණුපොතේ මුදාහැරලා තිබුනා.එතනින් කීපදෙනෙක් කියලා තිබුනා

 "අදින් පස්සේ නම් අපි ඉගැන්නූවා ,ගෙදර ආවා වගේ කතාන්දරයක්." 

ගුරුවරුන්ට ඒ පනත එක්ක දැනෙන අනාරක්ෂිතබව මට තේරුම් ගන්න අපහසු නෑ.හේතුව ළමයි (අවුරුදු 18 අවම) පිළිබඳ තීරණයක් කරළියට ආපූ ගමන් ඒ ගැටලූව/තීරණය හැඟිම්බරව සමාජයේ කතිකාවට ලක්වීමේ ඇති අවදානම. හැබැයි පනතේ මූලික ලියවිල්ල (Draft) කියවපු ගමන් මට  අවංකවම දැනුන දේ  නම්, මේ පනතෙන් වඩාත්ම ආරක්ෂණයක් ලැබෙන්නේ පාසලේ ඉගෙන ගන්න දරුවන්ටත් වඩා ළමා නිවාසවල හැදි වැඩෙන දරුවන්ට. මේ පනතේ ඉතිහාසයට ගියොත් , 1994 චන්ද්‍රකාගේ ආණ්ඩූව බලයට පත් උනු ගමන් 1995 Penal Code Ammendment no 22 සම්මත කරේ ළමුන්ගේ ආරක්ෂණය තහවුරු කරන්න. ළමා මෙහෙකාර සේවය වගේ වැරදි ඇස්පනාපිට අඩූ උනේ ඒ පනත නිසා. මහාචාර්‍ය හරේන්ද්‍ර සිල්වා ඒ වෙනුවෙන් විශාල වැඩකොටසක් කරලා තිබුනා.

දැන් මාලිමා ආණ්ඩූව කළේ ඒ පනතට සංශෝදන මාලාවක් ගෙනාපූ එක. මූලිකව ඔවුන් කරේ පහත සංශෝදන කිහිපය.

1. Corporal punishment for children (physical or humilating punishments) on children is now a criminal offence. 

දඬුවම් දීම (ශාරීරිකව හෝ මානසිකව අපහසුතාවයට /ලැජ්ජාවට පත්කිරිම) මෙම පනත ප්‍රකාරව අපරාධමය වරදකි.

  මේ වගන්තිය පිළිබඳ ළමා ආර්ක්ෂණ අමාත්‍යංශයේ නිලධාරීන්ගේ පැහැදිලි කිරිම අනූව මෙය කිසිවිටක ගුරුවරුන් පමණක් ඉලක්කකරගත් වගන්තිය නොව , ළමා රැඳවුම් මධ්‍යස්ථාන තුළ සිදුවන අකටයුතුකම් පාලනයට ගෙනා පාලකයක්. විශේෂයෙන්ම 82 අනුඛණ්ඩයෙන් පවා කියන්නේ ඕනෑම විශේෂතත්වයක් යටතේ ( දෙමාපියන් විසින් ළමයකුගේ විනය සකස් කිරිම , ගුරුවරයෙක් විසින් ළමයකුගේ විනය සකස් කිරිම ) වැනි කාරණයකදි ඉහතින් සඳහන්වන අපරාධමය දඬුවම් ක්‍රියාත්මක නොවන වගයි. 

Section 82 is updated to say any exceptional ( like parental discipline ) don't apply to corporal punushments.

 කොටින්ම

 "ළමයෙක්ගේ විනයවත් අපිට හදන්න බෑ දැන් කියලා ගුරුවරයෙක්ට හෝ දෙමාපියෙක්ට කියන්න බෑ තව දුරටත්."

 හැබැයි ශාරීරික පහරදීමකින් හෝ සභාවක් ඉදිරියේ ලැජ්ජාවට බඳුන් කිරිමකින් තොරව ( Humilation) . ඒක බොහෝම මානුෂීය ප්‍රගතිශීලී පියවරක් කියලා සානුකම්පිත හිතක් සහ තාර්කික මනසක් තියෙන ඕන කෙනෙක්ට තේරෙන සත්‍යයක්.

2. ඉහතකී අපරාධමය දඬුවම වලංගුවන්නේ දෙමාපියන්ට , ගුරුවරුන්ට , ළමා නිවාස භාරකරුවන්ට සහ අවුරුදු 18 අඩූ දරුවකුගේ භාරකාරත්වය දරණ ඕනෑම අයෙක් වෙතට.

3. සංශෝදන තුළම ඉහත නීතීය භාවිතාවන  ආකාර නිරූපිතලෙස (Illustrations) ලබාදී තිබෙනවා. මෙහි ප්‍රධාන ඇණවූම ලිපිය අවසන අමුණා ඇත. ( අවශ්‍යය කෙනෙක්ට කියවීමට)

• දරුවකුට බඳ පටියකින් පහර දීම : වරදක්

• ආහාර ලබාදීම හිතාමතාම පමාකොට ඒ හරහා දඬුවම් ලබාදීම        : වරදක්

• පාසලක් තුළ රැස්වීමක් ඉදිරියේ දරුවකු අපහසුතාවයට පත්කිරිම (public humilation)    : වරදක්

• ශිෂ්‍ය නායකයකුට දරුවකුගේ කොණ්ඩා මෝස්තරය හෝ නිල ඇඳුමේ වැරැද්දක් වෙනුවෙන් කම්බුලට පහරක් දීම ( එයින් ශාරීරිකව හානියක් නොවුනත් )    : වරදක්

මෙහි තෝරාගත් දරුවකු , අනෙක් දරුවන් ඉදිරියේ අපහසුතාවයට පත්කිරිම , මම පෞද්ගලිකව අත්වින්ද සහ සියැසින් දැක ඇති සිදුවීමක්. ඒ පිළිබද මා ලිව් සටහනක් මෙලෙස අමුණා තබන්නම්.

කෙසේ හො උක්ත සංශෝදන වෙනුවෙන් හිමි දඬුවම් ලෙස මාස හයකට නොඅඩූ සිරදඬුවමක් හෝ  රුපියල් ලක්ෂයකට නොඅඩූ දඩමුදලක් ගෙවිය යුතුය. වින්දිත පාර්ශවය ශාරීරික ආබාධ සහිත නම්  දඬුවම තවත් බරපතළ විය හැක. නැවත මා අවධාරණය කරන්නේ ළමා රැඳවුම් මධ්‍යස්ථාන තුළ සිදුවන අපචාර සමඟ මෙම පනතේ විධිවිදාන ගැළපෙන ආකාරය සිතා බලන ලෙසයි.

බොහෝදෙනෙක් වරදවා වටහාගෙන අදහස් ඉදිරිපත් කරන Penal Code හි 19 වන පරිච්චේදයට ඇතුළත්වන සංශෝදනයන්ගේ හරය මෙයයි.  ඔබ ගුරුවරයෙක් නම් දරුවාගේ නොගැළපෙන කොණ්ඩා මෝස්තරයක් නිවැරදි කිරිම , නිල ඇඳුමේ වැරැද්දක් නිවැරදි කිරිම මේ පනතෙන් වළකා නැත. වළකා ඇත්තේ ඒ නිවැරදී කිරිමේදි ශාරීරික දඬුවමට ඇති අයිතියයි. ඉතින් ඔබට හිතෙනවා නම් දරුවන් විනයවත් කිරිමේ එකම ක්‍රමය දඬුවම් දීමයැයි කියා.එය ඔබේ වරදක් මිස පනතේ වරදක් නොවේ. 

ප.ලි :-

අපි නම් ඉගෙනගත්තේ මෙහෙමයි , අරහෙමයි කියා කීම  තවත් වලංගු නැත.ඔබ ඉගෙනගත් 70,80 දශකයවත් , මා ඉගෙන ගත් විසිවන සියවසේ මුල්කාර්තුවවත් ලෙස ලෝකය , ආර්ථිකය , දේශපාලනය  ,නීතීය හෝ අයිතිවාසිකම් තවදුරටත් ක්‍රියානොකරයි. ඒ සියල්ල නවීන ලෝකයට අනුව වෙනස් වී ඇත. එය පිළිගැනිම වැඩිහිටි ඔබ සියල්ලගේම වගකීමයි. 

මනුජය තෙන්නකෝන්

1. පළමු ඇමිණුම : Penal Code Amendment :සංශෝදන අඩංගු පනත

2. දෙවන ඇමිණුම : දඬුවම් පිළිබඳ අර්ථ නිරූපණය.

Smokin' Joe : විවියන් රිචර්ඩස්

 ආසියානූ කුසලානේ පැරදිලා අබල දුබල වෙලා ඉන්න මොහොතකත් ක්‍රිකට් ගැන නොහිතා ඉන්න බෑ. අනෝරා වැස්සේ , සීතල මීදූමේ , කෝපි කෝප්පෙකුත් එක්ක මම World Cricket Encyclopedia  එක අතරින් පතර පෙරළුවේ ඒ නිසයි. David Gower ලීව පෙරවදනත් කියෝගෙන යන අතරේ බටහිර ඉන්දීය කොදෙව් පරිච්චේදයේ සිත නෙත දෙකම නතර උනේ නොහිතාම.

විවියන් රිචර්ඩ්ස් ඇන්ටිගුවාහිදි

සර් අයිසැක් විවියන් ඇලෙක්සැන්ඩර් රිචර්ඩස්. මෙන්න අද  අපේ මිනිහා.  උස අඩි පහයි අඟල් දහයයි. පුවක් ගස් තරම් උස ජැමෙයිකානූවෝ මැද උන්නූ ඇන්ටිගුවාවේ අභිමානය. 1974 ඉදන් 1991 වෙනකන් ලෝක ක්‍රිකට් මවිතයට පත්කරපූ ආශ්චර්‍යය. එක්දින ලෝක කුසලාන තුනක අවසන් තරග ක්‍රීඩා කරලා එතනින් දෙකකම කුසලානය දින්න පුරාවෘතය.දැන් කෙනෙක් අහයි ,

" ඔයා විවියන් රිචර්ඩ්ස් බැට් කරනවා දැකලා තියනවද ? "

"ඇයි අපි දුටුගැමුණු විජිතපුර සටන කරනවා දැකලද රචනා, කවි ,ගීත  එහෙම ලීවේ. අනේ නිකන් යන්න !!මල්ලී යන්න !! "

නොම්බර තුන පිතිකරුවෙක් කියන්නෙම චමත්කාරයක්. කුමාර් සංගක්කාර , රාහූල් ඩ්‍රාවීඩ් , රීකී පොන්ටින් , ජෝ රූට් , බ්‍රයන් ලාරා ලැයිස්තුව දැක්කම උනත් ඇඟ සීතල වෙනවා. විවියන් රිචර්ඩ්ස් මේ හැමෝටම කලින් නොම්බර තුනේ ඇණේ ගැහූව හාදයා.මම වමත් පිතිකරුවන්ට ආසක්ත උනත් , විවියන් රිචර්ඩ්ස් කියනේ මඟහරින්න බැරි පිටූවක්. ටෙස්ට් තරග 121 , සාමාන්‍යය 50.23. ත්‍රිත්ව ශතකයක් නොතිබුනත් ශතක 24 යි , අර්ධ ශතක 45 යි ඒ අඩූව හොඳටම පිරෙව්වා. මංගල තරඟය ඉන්දියාවේ බැංගලෝර්වලදි සෙල්ලම් කරන කාලේ විවියන් රිචර්ඩස් යාන්තමින් අවුරුදු විසිදෙකක් ලැබූවා විතරයි. ලකුණු 267 න් බටහිර ඉන්දීය කොදෙව්වෝ තරගය දිනූම් , සියවසේ නායකයා ක්ලයිව ලොයිඩ්ගේ දෙවෙනි ඉනිමේ ලකුණු 163 කවියක් වගේ මිහිරියි. පළවෙනි තරගෙදි විවියන් රිචඩ්ස් මහා ලොකුවට කැපී පෙනූනේ නැතත් , නායක ලොයිඩ් දෙවෙනි තරගයටත් මේ ඇනිටිගුවානූ දඩබ්බරයව කැඳෙව්වා. 

 තමන්ගේ ජිවිතේ දෙවෙනි ටෙස්ට් තරගය , තුන්වෙනි ටෙස්ට් ඉනිම ,නොදැවී ලකුණූ 192 යි. මුලූ ලෝකය්ම ඔහු ළඟ.නායකයාගේ තෝරාගැනීම , විවියන් තරුණයා මනාව සාධාරණීකරනය කළා. අවාසනාවට ඔහූ ද්විත්ව ශතකයට යන්න කලින් බ.ඉන්දීය කොදෙව් අනෙක් අන්තය දැවීගියා. ඉන්දීය දෙවෙනි ඉනිමෙදි ගිබ්ස් ලකුණු 76 ට කඩුලු හයයි. ඉන්දීයානූ ඉනිම විනාශයි. ඉනිමකින් සහ ලකුණු 17 න් ජය කොදෙව්වන්ටයි. විවියන්ගේ ලකුනු මැෂිම වැඩකරන්න ගන්නේ එතන ඉදන්.

පකිස්තානූ වේග පන්දූවේ ප්‍රතිමූර්තිය , වසීම් අක්‍රම් නම්  සර් විවියන් රිචර්ඩ්ස් මතක් කරන්නේ

වසීම් අක්‍රම් කඩුල්ලක් සමරමින්

 

"Nobody likes him; he literally tried to kill me in the Barbados test!"

එංගලන්තයේ හිටපූ ආරම්භක පිතිකරු ජෙෆ් බොයිකොට්ට අනුව නම් 

ජෙෆ් බොයිකොට් පසුකලක විස්තර විචාරකයකු ලෙස

"No one picks the length like Viv - my all-time favorite!"

ලාහෝර් සිංහයා , එහෙම නැත්නම් පකිස්තානයට 1992 ලෝක කුසලානයක් දිනාදුන් නායකයා ඉම්රාම් කාන්ගේ අදහස 

ඉම්රාන් ඛාන් 

 "Arguably, he's one of the greatest batsmen of all time. He's a genius."

විවියන් රිචර්ඩ්ස් ගේ ආක්‍රමණශීලී පිතිකරණයත් , කෙටි පන්දුවට දක්වන නිර්භීතබවත් නිසා ඔහූ ඕස්ට්‍රේලියානූ , එංගලන්ත තණතිලිවල අතිශයින්ම බිහිසුණු උනා.හොඳට ඉපිලිම තියෙන වේගවත් තණතිලිවල වෙනත් පිතිකරුවෝ පැකිළෙන අවස්ථාවල  ඔහූ වේගයෙන් , හැබැයි ස්ථිරසාරව ලකුණු රැස් කරා. 1976  කැලැන්ඩර් වසරෙදි විතරක් ඔහූ ටෙස්ට් ලකුණු 1710 ගැහූවා. එයින් ලකුනු 829 ආවේ එංගලන්තය එක්ක තරග හතරකින් . එහි ලකුණු සාමාන්‍ය 118.42. ඔහුගේ එංගලන්ත වික්‍රම ගැන ඊටත් වඩා මොනවා කියන්නද ?

විවියන් රිචර්ඩ්ස් කියන්නේ ලෝක කුසලාන හතරක් නියෝජනය කරන්න වාසනාව ලැබුනු ක්‍රීඩකයෙක්. ලෝක කුසලාන තරග 23 යි , ඉනිම් 21 යි , ලකුණු 1013 යි. තරගයක ලකුණු සාමාන්‍යය් 63.31. හොඳින් කල්පනා කරොත් සෙල්ලමක් නෙවෙයි ඒ ඉලක්කම් . ඊට අමතරව ශතක තුනකින් සහ අර්ධ ශතක පහකින් ඔහුගේ ලෝක කුසලාන දිවිය වර්ණවත් වුනා. එයිනුත් 1979 ලෝර්ඩ්ස් හි අවසන් මහා තරගයේ නොදැවී ලබාගත්ත ලකුණු 138 ඉනිම වගේම 1987 ලෝක කුසලානයේදි පන්දු 125 න් ශ්‍රි ලංකාවට එරෙහිව ලබාගත්ත ලකුණු 181 ඉනිමත් ඉහළින්ම කියවෙනවා. එදා අසන්ත ද මෙල්ගේ පන්දුවාර දහයට ලකුණු 97 යි , අසංග ගුරුසිංහගේ පන්දුවාර හතරට ලකුණු 43 යි. ගිණිකෙළි පරාදයි.

කැරීබියානූ නිදහස , කැලිප්සෝ සංගීතය , අනුකම්පා විරහිත පුල් පහර , ආයාසයකින් තොරව ලකුණු රැස් කිරිම , බටහිර ඉන්දීය කොදෙව් සටන්කාමීත්වය  සහ අපේ කතානායක විවියන් රිචර්ඩ්ස්ගේ වීරත්වය තවත් අවුරුදු ගාණක් මේ විදියට කියවෙයි , ලියවෙයි , සංස්කරණය වෙයි .  ශ්‍රේෂ්ඨයෙක් කියන්නේ අන්න එහෙම වෙන්න පුලුවන් කෙනෙක්ට කියලා අනාගත ක්‍රිකට් ලෝකයට හැමදාම මතක තියෙයි.

විවියන් විචර්ඩ්ස් ලෝර්ඩ්ස් ක්‍රීඩාංගණයේ ඇති තම ආලේඛ්‍ය චිත්‍රය සමඟ

Miracle of Headingley (හෙඩින්ලි හි ප්‍රාතිහාර්‍ය)

හැමෝටම බොතම් කෙනෙක් වෙන්න බෑ. පාන්දර වෙනකන් අඩි පුඩි ගහලා උදේ තියෙන මැච් එකේ ලකුණු පනහක් එක්ක  විකට් පහක් ගන්න පුලුවන් කීයෙන් කීදෙනාටද ? සර් ඉයන් බොතම් ඒ දෙකම කරපූ කෙනෙක්. බොතම් මොනවගේද කියලා තේරුම් ගන්න ඇන්ඩෲ ෆ්ලින්ටෝෆ් ,බෙන් ස්ටෝක්ස් දෙන්නව බලන්න. ඒ තමා බොතම්ගේ මිනි වර්ශන්ස් දෙක. 

1981 අළු බඳුන තරගාවලියේ තුන්වෙනි තරගය බොතම්ව උඩටම උස්සලා තිබ්බ තරගයක්.  ඕස්ට්‍රේලියාව කාසිය වාසිය දිනලා ලීඩ්ස් තණනිල්ලේ පන්දුවට පහර දෙන්න තීරණය කරන්නෙම සුද්දන්ට බැටේ දෙන්න හිතාගෙන. සැලැස්ම සාර්ථකයි ඕස්ට්‍රේලියානූ පළවෙනි ඉනිම 401 යි කඩුලු නමයයි. හැබැයි අපේ වීරයා බොතම් ලකුණු 95 ට කඩුලු හයයි. ඉනිම අත්හිටවලා කිම් හියූස් එංගන්තයට පන්දුවට පහර දෙන්න ආරාධනා කරන්නේ ඉනිමකින් තරගය දිනාගෙන බර්මින්හැම් තරගයට පුලුවන් ඉක්මනය දුවන්න.

පිට පිටම දෙවෙනි වතාවටත් එංගලන්තය ,ඕස්ට්‍රේලියාව ඉස්සරහ අසරණයි. පළවෙනි ඉනිමට ලකුණු 174 යි. හැබැයි , අපේ වීරය තාම කෙලින්. බොතම් පන්දු 58 ට ,හතරේ පහර අටයි ලකුණු 50 යි. දැන් නම් සෙල්ලම ටිකක් භයානකයි. ඉනිමක පරාජයෙන් බේරෙන්න  ක්‍රිකට් උපන් රටට තවත් ලකුණු 227 අවශ්‍යයි. 

ඕස්ට්‍රේලියානූ නායක කිම් හියුස් එංගලන්තය නැවත පන්දුවට පහර දෙන්න දාන්නේ ඒ නිසයි.ඇරඹුමම කඳුළක් වෙලා ඩෙනිස් ලිලී  පන්දු තුනකින් ග්‍රැහැම් ගූච්ව දවාගන්නවා. එංගලන්ත ලකුණු පූවරුව 0-1. මගේ ප්‍රියතමයා ජෙෆ් බොයිකෝට් පන්දු 141 ට මුහුණදීලා ධෛර්‍යසම්පන්න ලකුණු 46 යි. පීටර් වයිලි හැරෙන්න අනෙක් එංගලන්ත පිතිකරුවෝ එදා ගැහූවේ ටෙලිෆෝන් නම්බර්ස් විතරයි. බොබ් ටේලර් දැවෙනකොට එංගලන්ත ලකුණු පුවරුව 135-7. දිනුම කෙසේවෙතත් ඉනිමකින් තරගය පරාද නොවෙන්න නම් එංගලන්තයට තව ලකුණු 92 ඕන. කඩුල්ලේ ඉන්ද්‍රඛීලයක් වගේ නොසෙලී ඉන්නේ අපේ වීරයා. ඉයන් බොතම් .

 පන්දූ 148 , නොදැවුනු ලකුණු 149 යි. හතරේ පහර 27 , එක හයේ පහරයි. ඒ හැමදේකටම බොතම්ට ගත උනේ මිනිත්තු 240 යි. වෙන්නේ මොකක්ද කියලා ඕස්ට්‍රේලියානූවෝ හරිහැටි තේරුම් ගන්නකොට එංගලන්තය ලකුණු 129 ඉලක්කයක් ලකුණු පුවරුවේ තියලා ඉවරයි.හිස් ආවරණයක් නැතුව බොතම් එංගලන්ත ප්‍රේක්ෂකයන්ට ගිණිකෙළ සංදර්ශනයක් පෙන්නූවේ නොමිලේ. පිට ඉන්නෙන් පිටත පතිත උනූ එක පන්දුවකටවත් බොතම් නෙවෙයි සමාවක් දුන්නේ. එංගලන්ත දෙවෙනි ඉනිම ලකුණු 356 යි. කෙන්ට් වේග පන්දූ යවන්නා උනු ග්‍රැහැම් ඩිලීගෙන් මසුරන් හා සමාන ලකුණු 56 යි. ඩීලී ,බොතම් එක්ක එකතුවෙලා අටවෙනි කඩුල්ලට ලකුණු 117 ගැහූවා. තරගේ උඩුයටිකුරු උනේ ඒ සබඳතාවයෙන්.

අවසන් ඉනිමේ ලකුණු 130 ඉලක්කයක් හඹා ගිය ඕස්ට්‍රේලියානුවන් පන්දුවාර 36 යි එක පන්දුවක් තුළ ලකුණු 111 සීමා උනේ  බොබ් විල්ස්ට පිං සිදුවෙන්න. දැන් දෙව් මව් තුරුළේ ඉන්න වේග පන්දූ යවන බොබ් විල්ස් ලකුණු 43 ට කඩුලු අටයි. අපේ වීරයා පන්දුවාර හතයි , ලකුණු 14 යි කඩුල්ලයි. එක මොහොතක කඩුලු දෙකකට ලකුණු 56 ගහලා හිටපූ ඕස්ට්‍රේලියානුවන්ගේ අවසන් කඩුලු අටම ලකුණූ 55 දැවුනේ ලීඩ්ස් ජයග්‍රහණය එංගලන්තයට හිමිකර දෙමින්.

 ක්‍රිකට් ඉතිහාසයේ Follow on (පිට පිට ඉනිමක පරාජයකින් බේරීමට පන්දුවට පහර දීම.) අවස්ථාවකින් තරගයක් ජයග්‍රහණය කළ දෙවෙනි අවස්ථාව මේක. අදටත් පැරණි ක්‍රිකට් ලෝලීන් කතාවෙන Miracle of Headingley තරගය තමා මේ දෙවෙනි අවස්ථාව.

ඡායාරූපය : නොදැවුනු ලකුණු 149 පස්සේ හෙඩින්ලී ක්‍රීඩාගාරයේ ඉදන් සිගරට්ටුවක් බොන සර් ඉයන් බොතම්.

ලබ්බේ තොවිලේ

 "රට ගිහින් ගොඩ යනවා "

 කියන එක අපේ මිනිස්සුන්ට කොයිතරම් අවිඥානිකව බලපානවද කියන එක තේරෙන්න මට අවුරුදු විසි එකක් විතර ගියා. ඒකට හේතු උනේ මගේ ළඟම මිත්‍රයෝ කීපදෙනෙක්. 

ලංකාවේ රස්සාවක් කරගෙන , කෝස් එකක් කරගෙන සනීපෙට හිටපූ මගේ මිත්‍රයෝ කීපදෙනෙක්ට රට යන උණක් වැළදුනා."මෙහෙ හිටියොත් වගතුවක් නෑ , රට ගිය කාලෙක තමා අපේ ජිවිත හරියන්නේ " වගේ අදහසක් නිතරම නිතරම ඔවුන් කියන්න ගත්තා. මේ ලංකාවේ ආර්ථික අර්බුදය එන්න පොඩි කාලෙකට කලින්. 

වැඩි විස්තර නොකියා කීවොත් කොල්ලෝ බොහෝම බරපතළ ඇමකට අහුඋනා.මම පෞද්ගලිකවම මුල් කාලේ ඔවුන්ට මේ විදියට නම් පුතේ රට යන්න බෑ  කියලා ඒත්තු ගන්වන්න හැදුවත් ඒක පිළිගන්න එතන හිටපූ බොහෝ දෙනෙක් කැමැති උනේ නැහැ.මගේ අප්පච්චි පවා දවසක් කීවේ

 "මේක තේරුම් කරලා දෙනවා ඒ ළමයින්ට කියලා ."

අප්පච්චිට පුන්‍යානූමෝදන් වේවා !!

මේ නූල්බෝලේ ඔවුන් කොච්චර තදට පැටලූනාද කියනවනම්  තමන් විඳපූ සනීප ජිවිතේ ආපස්සට කණපිට හැරෙන තරමට ඒ පැටලීම් ප්‍රබල උනා. 

බෞද්ධ භික්ෂුවක් යැයි කියාගන්න අයියා කෙනෙක් මේ මිනිස් ජාවාරමට අතගහලා තිබුනා. භික්ෂුවක් අතගහපූ ගමන් එල්ලවෙන සමාජ වෛරය , නෛතීක විරෝධතා , සාම්ප්‍රදායික එරෙහි වීම් ඒ නිසා පස්සේ කාලෙකවත් ඇති උනේ නෑ. වැඩේ ගැස්සූනාට පස්සෙත් එතන හිටපූ මගේ හොඳම මිත්‍රයෙක්ට මම නිතරම කීවා පොලීසීයට හරි මාධ්‍යට හරී මේක අරන් යමු කියලා.ඒත් ඔවුන්ගේ තිබ්බ පෞද්ගලික න්‍යාය පත්‍ර නිසාත් අනෙකුත් පෞද්ගලික කාරණත් නිසා ඒ කිසිම දෙයක් ක්‍රියාත්මක උනේ නෑ. ශ්‍රමණ වෙසින් ආ පාදඩයෙක් තරුණ ජිවිත කීපයක් උගස් කරලා පැනලා ගියා. මගේ මිත්‍රයෝ කිසිම දෙයක් නොවුන ගාණට තම තමන්ගේ නිහඬ ජීවිතවලට ඇතුළත් උනා.

ඔවුන්ගේ අතාර්කික ,ප්‍රායෝගිකත්වයෙන් බොහෝ දුර තිබුනු සිහිනය ගැන අද මට හිතෙන්නේ එදාට වඩා වෙනස් මානුෂීය තැනකින්.ඒ කාලේ ඔවුන්ට මම කිය කිය හිටියේ 

"ඔය ***** ගෙඩියා උඹලව යැව්වොත් , මම ෆිල්ම් එකක් හදනවා ඒ ගැන කියලා."

ඒත් අද මම හිතෙන්නේ මිනිහෙක් අහුවෙන්නෙම තමන් ආස දේට. මේක කියවන ඔබ ,ලියන  මම  අපි හැමෝම එහෙමයි. හීන කියන්නෙම ඇමක්. මේ අලකලංචිය වෙලා අවුරුදු ගාණක් නිසා ,ඒක මගේ හිතෙන් දුරස් වෙලා තිබුනේ. ඒත් ඉරිදා නිවාඩූවේ තිසර මංගල බණ්ඩාර ලියපූ "ලබ්බේ තොවිලේ " කෙටි චිත්‍රපටිය බලන්න ලැබුනා. මගේ ඇඟ හීතල උනා.ඒ සීතල උන ඇඟිලි වලින් මේ ටිකත් ලීවේ.

ප.ලි : මං කියන දේ තේරුම් ගන්න   නම් කෙටි චිත්‍රපටිය බලන්න. ලින්ක් එක පහලින් අමුණලා ඇති.

ලබ්බේ තොවිලේ කෙටි චිත්‍රපටය

උපන්දිනේ අද ඔහුගේ....

 අද ජනාධිපති ජයවර්ධනගේ උපන්දිනේ.උන්දෑ හිටියනම් අච්චරයි ,මෙච්චරයි කියලා වැඩක් නෑ. මොකද එයා  නැති උනෙත් අවුරුදු අනූවක් විතර ජීවත් වෙලා නිසා. මගේ හිත නම් කියන්නේ, නිදහස් ලංකාවට ජයවර්ධන තරම් බලපෑමක් කරපූ කිසිම දේශපාලකයෙක් නැහැ. ඒ බලපෑම කොච්චරද කියනවනම් 88-89 කඩපිල්වල 

"ජේ.ආර් මරමු..." 

කියලා ජවිපේ සන්නද්ධ අංශයට ලියන්න සිද්ධ උනා.හැබැයි ඒ කිසිම කෙනෙක්ට ජයවර්ධනගේ මයිලයකටවත් හානි කරන්න බැරි උනා. හැබැයි ජයවර්ධනයි ,එයාගේ අනූප්‍රාප්තික ප්‍රේමදාසයි ජවිපේ සන්නද්ධ අංශය  1990-1991 වෙනකොට බිමටම සමතලා කරා. ඔවා ඉතින් ඉතිහාස කතා . පස්සේ කාලෙක ඕවත් ලියවෙන්නේ මෙන්නම් මෙහෙම‍ 

" නොමඟ ගිය ආයූධ සන්නද්ධ තරුණ කැරලිකරුවන් , වයෝවෘද්ධ එහෙත් ඔදවත්, තෙදවත්, බලවත් ,නැණවත් ජේ.ආර් උතුමාණන්ව ඝාතනයට තැතක් දැරුවෝය.එලෙසින් කුමන්ත්‍රණ කළවුන්ගේ වෑයම තිඹිරිගෙයිම වළලා දැමූවෝය." 

මහාවංශයේ,ථූපවංශයේ,ඨාටවංශයේ ,චූලවංශයේ හැම අකූරක්ම ඇත්ත කියලා අදහන උදවිය මේවටත් අනාගතේ සාධූකර දෙනවා සත්තයි. ආපහූ අද උපන්දිනය යෙදුනු ජයවර්ධනට පැත්තට හැරෙමුකෝ.  

ජයවර්ධනට සුවපහසු ළමා වියක් , තරුණ වියක් වගේම මැදි වියකුත් තිබ්බා. ඒත් මහලූ විය එච්චරම පහසු උනේ නෑ. උතුරේ ජාතිවාදි අරගලයෙනුයි , දකුණේ ජවිපේ සන්නද්ධ අරගලයෙනුයි ජයවර්ධන 1988 විශ්‍රාම යනකන්ම හොඳටම ගුටි කෑවා. එච්චර රාජතාන්ත්‍රිකයා උනූ ජයවර්ධන අන්තිමට ප්‍රේමදාසට ඉතුරු කරලා ගියේ දෙකොණ ඇවිලිනු විලක්කූවක් වගේ රටක්. කොටින්ම ඒ ප්‍රශ්න දෙකෙන් එකක්වත් ජයවර්ධන එයාගේ ධූරකාලය ඇතුළේ විසඳගන්න අපෝහෝසත් උනා. 

උතුරේ අරගලය යාන්තමින් බේර ගන්න තිබ්බ හැමතැනකදිම ජයවර්ධනගේ උද්දච්චකම එයාටම එරෙහි  උනා. 1981 යාපනේ සංවර්ධන සභා ඡන්දෙදිත් , 1983 ජූලි කලබලේදිත් වගේම 1987 Operation Liberation දෙවෙනි අදිරයේදිත් විධායක ජනාධිපතිවරයෙක් හැසිරිය නොයුතු විදියට ජයවර්ධන වැඩ කරා. ආත්ම ගාණකට ආපස්සට හරවගන්න බැරි තරමේ තීරණ කීපයක් ගත්තා. අන්තිමට ඉන්දීය හමුදාව ජයවර්ධනගෙන් අහන්නෙත් නැතුව යාපනයට පරිප්පූ දැම්මා. ඊට දවස් කීපයකට පස්සේ කන් පාත්කරගෙන රජීව් ගාන්ධි ළඟ ඔහූ ඉන්දූ-ලංකා ගිවිසුම අත්සන් කරන ගමන් ලංකාවේ ස්වෛරීත්වය කියන මිනී පෙට්ටියේ අන්තිම ඇණෙත් තද කරා.

දකුණේ සන්නද්ධ අරගලයෙදි , ඔහුට තිබුන කොමියුනිස්ට් භීතීකාවත් එක්සත් ජනපද ප්‍රේමයත් නිසා 1983  කලූ ජූලිය සමාජවාදීන්ගේ වැඩක් යැයි කියමින් ජවිපේ ඇතුලු පක්ෂ කිහිපයක්ම තහනම් කළා. 1977 නිදහස් දේශපාලනය ඇවිත් 1982 ජනාධිපතිවරණයට පවා තරග කරගෙන ප්‍රජාතන්ත්‍රවාදී පාරක ඇවිදගෙන එමින් සිටි ජවිපේ ජයවර්ධනගේ තීරණය එක්ක සම්පූර්ණයෙන්ම යටිබිම්ගත දේශපාලනයකට ඇදිලා ගියා. ඒ තීරණයට පිං සිද්ධ වෙන්න උගත්, හැකියාවක් තිබුනු  තරුණයෝ 60000 විතර 1991 වෙනකොට තමන්ගේ තරුණ ජීවීත  බිලිදීලා තිබුනා. හැමෝම ජවිපේ දෙවෙනි කැරැල්ලේ අලූගෝසූවා විදියට ප්‍රේමදාසව හංවඩූ ගැහූවට , සමූලඝාතනයේ නිර්මාතෲ වුනේ සුදු ඇන්ද ජයවර්ධන.

ජයවර්ධන එක්ක මට තියෙන්නේ Love-hate රිලේෂන්ෂිප් එකක්. එයා 1943 රාජ්‍ය මන්ත්‍රණ සභාවට ඇවිත් , තමන්ගේ මාමණ්ඩි උනූ (අම්මගේ සහෝදරයා) ඩී.ආර් විජේවර්ධන පවා උදව් නොකරන තැනක කැළණිය ආසනය දිනලා , නිදහස් ලංකාවේ පළවෙනි මුදල් ඇමති වෙලා , 1953 කොතලාවල , 1965 ඩඩ්ලි ,1970 අන්ත පරාජය කියන හැමදේම පහුකරගෙන ඇවිත් 1977 හයෙන් පහක් ගත්ත විදිය මට හූරේ දාන්න හිතෙන වැඩක්. 1943 ඉදන් 1977 වෙනකන් අවුරුදු 34 එකම ඉලක්කයක් වෙනුවෙන් වැඩකරපූ එකටත් ලකුණු දහයෙන් දහයක් දෙන්න පුලුවන්. ඒත් මනුස්සයෙක්ගේ මුල මැද අග තුනම එක සමානව වැදගත් කියන්න ජයවර්ධන තරම් හොඳ නිදසුනක් නෑ. ජයවර්ධනගේ මුල මැද වර්ණවත් උනාට අග අතිශයින්ම දූෂිතයි.

ජයවර්ධන ගැන මුල සිට අගට කියවනවනම් , ඔහුගේ චරිතාපදානය ,ජයවර්ධන කේන්ද්‍රයේන් ගන්න පුලුවන් . වෙලූම් තුනක් තියෙන පොත K.M De Silva සහ Howard wriggins ලියලා තියෙන්නේ බොහෝ විස්තර ඇතුළත් කරගෙන. මම මේ උපන්දින සටහන ලියන්නෙ ඒ වෙලූම් තුනේ අකුරක් නෑර කියවලා. 

"ජනාධිපති ජයවර්ධන තරම් තමන් කරන දේ දැනගෙන කරපූ නායකයෙක් ලංකා ඉතිහාසයේ නෑ. ඒත් ඔහු කළ දේ හරිද , වැරදිද කියන එක බොහෝම විවාදසම්පන්නයි." 

ඩොලර් දහයකින් සිනමාකරුවෙක් වීම

තිසර මංගල බණ්ඩාර ලියලා , තිසර ඉඹුලාන අධ්‍යක්ෂණය කරපූ මෝඩ තරිඳූ ෆිල්ම් එක ඔක්තෝම්බර් 10 වෙනිදා එළියට එනවා  . ඒ නිසාම ඊයේ හවස  තිසර මංගල බණ්ඩාරගෙයි තරිඳු උඩුවරගෙදරගෙයි චිත්‍ර්පටිය පිළිබඳ සාකච්චාව අහන්න පටන් ගත්තා.ඒක ඇතුළේ එක තැනක තරිඳු කියනවා

 How to become a filmmaker with 10 dollar

"ඩෙනිසුයි , චන්දන ප්‍රසන්නයි එක කාලෙක කැමරාවක් අරගෙන තිසර ඉඹුලානවයි හඳගමයි , බූඩීයි හම්බෙන්න ගිහින් ඩොලර් 10 න් සිනමාකාරයෙක් වෙන්නේ කොහොමද අහන වාර්තා වැඩසටහනක් කරා නේද කියලා. " 

ඒක ඇහුන ගමන් මම මෝඩ තරිඳු වැඩේ පැත්තකට දාලා පැයයි විනාඩි දාහතරක  "How to become  a filmmaker with 10 doller " බලන්න ගත්තා. 2010  විමල් වීරවංශ ලෙමන් පෆ් කකා තුම්මූල්ලේ UN එක ඉස්සරහා මාරාන්තික උපවාසයක් කරන කාලෙ , එහෙමත් නැත්නම් ඩොලර් එක රුපියල් සීයට ගිය කාලේ  ඇතුළත තමා මේ වාර්තා වැඩසටහන දෙන්නා කරන්නේ. වාර්තා වැඩසටහනක් කීවට එහෙම වාර්තාමය ගතියක්  වැඩේ ඇතුළේ නෑ.

 හිටපූ ගමන් බස් කබලක් ඇතුළෙ ඩෙනිසුයි , චන්දනයි කැමරා එක ඔන් කරලා මොනවදෝ කියනවා ඒත් ඔලූවෙන් හිටගෙන රෙකෝර්ඩ් වෙන්නේ , තවත් වෙලාවක ෆිල්ම් කෝපරේෂන් එක ඇතුළට යන්න නොදී අමුත්තෙක් ඇවිත් සද්දයක් දානවා දෙන්න හැරිලා එනවා.තවත් වෙලාවක ෆිල්ම් කෝපරේෂන් එක ඇතුළට ගිහින් සිනමාකරුවෙක් වීම ගැන කෝපරේෂන් එකේ මතය අහනකොට ඒ වෙනකොට Deputy Manager උනු ලංකා ධර්මවික්‍රම දපනේ දාලා කැරකෙන පුටුවක ඉදන් ඉන්නව කරන්ට් එක ගිහින් දාඩිය කිය කිය ( 46:01) . හිටපූ ගමන් කඩේක වැඩ කරන අයියා කෙනෙක්ට කැමරාව දීලා ඩෙනිස් ගිහින් පාර දිහා තත්පර දහයක් බලන් ඉන්නවා. 

වාර්තා චිත්‍රපටිය පූරාම සිරිමල් විජේසිංහ , අශෝක හඳගම, විමුක්ති ජයසුන්දර,සංජීව පුෂ්පකුමාර, ප්‍රසන්න විතානගේ , ප්‍රසන්න ජයකොඩි , වසන්ත ඔබේසේකර , බූඩී කීර්තීසේන  වගේ පොරවල් සෙට් එකක් ඩෙනිසුයි , චන්දනයි ගිහින්  හම්බෙනවා. සිරිමල් නම් දූමක් දාන ගමන් මොනාදෝ බයිලයක් කියනවා. බූඩී ඇමෙරිකාවේ මෙහෙමයි , මෙහේ මෙහෙමයි කියනවා ". සිනමාවේ ප්‍රශ්න තිබ්බට ඒවා කියන්නේ කාටද බං ? අපේ ප්‍රශ්ණ අහන්නේ කව්ද කියලා හඳගම මූණටම අහනවා. "මම මූණ හොදලවත් නෑ කියලා ජොගින් කරන්න ආපු ප්‍රසන්න විතානගේ රටේ ජනාධිපති කෙනෙක් අල්ලගෙනත් සිනමාකාරයෙක් වෙන්න පුලුවන් කියලා රහසක් කියනවා. "  වසන්ත ඔබේසේකර සරමක් බඩ මැඳට ඇඳගෙන හාන්සි පූටුවක දිගෑදීලා " සිනමාකාරයෙක් වෙන්න නිෂ්පාදකයෙක් නෙවෙයි වැදගත්ම දේ , ඔයාට තියෙන ආධ්‍යාත්මික අවශ්‍යයතාව (Desire) කියලා පැහැදිලි කරනවා. සෙරෙප්පූ කෑලී දෙකක් දාලා සයිඩ් බෑග් එකක් දාගත්ත ඩෙනිසුයි චන්දනයි පාර දිගේ ඔහේ ඇවිදිනවා , කටූ කම්බි ඇතුළෙන් පනිනවා , රුපියල් අසූවට කිරි කාල තුනක් බොනවා .ඒ හැමදෙයක්ම රෙකෝර්ඩ් වෙලත් තියනවා 

කලින් ප්‍රවීණයන්ගේ අදහස් ඔක්කෝම  අහලා ඇවිත් ඩෙනිසුයි චන්දනයි කතා වෙනවා. " මුං හැම එකාම එක එක දේවල් කීවා. ඒත් මුං නොකීව දෙයක් තියනවා. උං ඒක නොකියා හංගනවා නේද ?"   (50.33).

 මේක මාර වැඩක්වත් , අති සම්භාව්‍ය කෘතියක් නෙවෙයි . ඒත් ෆිල්ම් කෝස් එකක් කරල සිනමාකාරයෙක් වෙන්න සල්ලී නැති නිසාම ඒ ගැන වාර්තා චිත්‍රපටියක හැඩේට වැඩක් කරපූ කොල්ලෝ දෙන්නෙක්ගේ වැඩක් . දැන් නම් දෙන්නටම කොල්ලො කියන්න අමාරුයි ටිකක්. කොහොම හරි උං දෙන්නා ඒක කරන අව්‍යාජත්වයයි (Rawness)  , සම්මුඛ වෙන මිනිස්සූයි නිසා මං සෑහෙන විනෝදෙකින් How to become a Filmmaker with 10 dollar බැලූවා. මං ඇත්තටම දන් නෑ පස්සෙ කාලෙක හරි ඩෙනිසුයි , චන්දනයි බලාපොරොත්තු උනූ සිනමා හීනෙට ගියාද කියලා. හැබැයි වැඩක් කරනවනම් මේ වාර්තා වැඩසටහනත් වැඩකට කියාපූම ප්ලොට් එක. Halal love story වගේ රහ වැඩක් කරන්න තිබ්බා එහෙනම්.

මනුජය තෙන්නකෝන්.

රාජපක්ෂගේ කර්මයක මහත

 පහත ඡායාරූපය නිතිඥ් Nisal Dulmith  අයියගෙන් ඉල්ල ගත්ත මොහොතේ  එක නිමේෂයකින්  2013 ජනවාරියේ අගවිනිසුරු ශිරාණි බණ්ඩාරනායකව නිල නිවසෙන් පිටකිරිම සිනමාපටයක් වගේ මට මැවෙන්න  පටන් ගත්තා. මාධ්‍ය වටකරගෙන තමන්ගේ පුතා පදවන මෝටර් රථයෙන් ඈ    නිල නිවසෙන් පිටවෙන විට අවසානයටම කීවේ 

"ඔයාලා( රටේ ජනතාව) මාව බලාගන්න . "  

එකල පැවති බල උන්නතීකාමීත්වයේ මත්වී සිටී රාජපක්ෂ විසින් අධිකරණයේ ස්වාධීනත්වය කෙලෙසුවේ එලෙසිනි. ඉන් කලකට පසුව ආචාර්‍ය බණ්ඩාරනායක ලීව් "උත්තරීතර - දෝෂාභියෝගයේ ඇතුළාන්තය කෘතිය අකූරක් නෑර කියවූ විට මෙරට නොම්බර එකේ දේශපාලන ජඩයා ලෙස  ජයවර්ධන ජනාධිපති හඳුන්වන්නේ යම්ලෙසද රාජපක්ෂත් ඒ සමාන මට්ටමින් පුරා වසර 10 ක්‍රියා කළ බව කැට තබා කිව හැකිවනු ඇත. 

ශිරාණි බණ්ඩාරනායකව දෝෂාභියෝගයට නතුකොට සේවයෙන් නෙරපා දැමුවේ අනීතිකවය.නමුත් දින දෙකකට පෙර රාජපක්ෂව විජේරාමෙන් මැදමුලනට යැව්වේ නෛතීකවය. වසර දොළහකට පෙර  අගවිනිසුරු ආචාර්‍ය බණ්ඩාරනායක තමාගේ ආරක්ෂාව ඇත්තේ ජනතාව අතබව පැවසුවේය. ඒ ජනතාවගේම ඡන්දයෙන් පත්වූ දිසානායක ජනාධිපති ප්‍රමුඛ ආන්ඩූව "හිටපූ ජනාධිපතිවරුන්ගේ හිමිකම් අහිමි කිරිමේ පනත" නීතීයක් බවට පත්කර රාජපක්ෂව නිලනිවසෙන් ඉවතට දැමුවේය. ශ්‍රී ලංකාවේ වසර දොළහක කාල පරාසය තුළ ජනතා ප්‍රජාතන්ත්‍රවාදයේ හැසිරිම තේරුම් ගැනිමට මීට වඩා තවත් උදාහරණ නොමැත. 

කාල් මාක්ස් වරක් පැවසූ අන්දමට "ඉතිහාසය නැවත නැවත ක්‍රියාත්මක වේ . මුලින්ම එය ඛේදනීය අන්දමින් ක්‍රියාත්මක  වන අතර පසූව එය විහිළුසහගත අන්දමින් ක්‍රියාත්මක වේ. " 

History repeats itself ,first as tragedy , second as farce.

ඉහත ඡායරූපය අනුව රාජපක්ෂගේ ඉරණම ඛේදවාචකයක්ද , විහිළුවක්ද යන්න තීරණය කිරිම ඔබ සතු කාර්‍ය්ක

මට ඕන ගුරුවරයෙක් වෙන්න..

 මට ඕන ගුරුවරයෙක් වෙන්න.

ගුරුවරයෙක් ? 

ඔව් !! ගුරුවරයෙක්.

මොන ජාතියේ ගුරුවරයෙක්ද ?

මොන ජාතියේද ?

ගණිතය ,සිංහල , විද්‍යාව වගේ උගන්වන ගුරුවරයෙක් වෙන්නද ? නැත්නම් ඉංග්‍රීසී ,භූගෝල විද්‍යාව , ඉතිහාසය උගන්වන ගුරුවරයෙක් වෙන්න ? එහෙමත් නැත්නම් සංගීතය , නැටූම් , නාට්‍ය උගන්වන ගුරුවරයෙක් වෙන්නද ? 

නෑ මට ඕන ගුරුවරයෙක් වෙන්න.වර්තමානයවත් අනාගතයවත් නොදැන අතීතයේම පල්වෙලා කුණුවෙන ඈත දූර ගමක  දරුවන්ට ගුරුවරයෙක් වෙන්න. 

රෑට තරු පිරුණූ පැහැදිලි අහසක දඩයක්කාරයා , මහා වලසා වගේම යාන්තමින් දැල්වෙලා නිවෙන ඉරබටූ තරුව කව්ද කියලා , හැතැම්ම මිලියන ගාණක දූරින් දිලිසෙන තරු රටා බලලා  උගන්වන පුළුවන් ගුරුවරයෙක් වෙන්න. ඒ තරු රටා ඇතුළේ කිමිදෙන ග්‍රීක පුරාවෘත දරුවන්ට කියාදෙන ගමන් මනුෂ්‍යයෙක්ව ඉපිද දේවියෙක් වූ "හර්කියූලීස්" ගේ නොසිඳෙන එඩිය ගැන කතාන්දර කියන ගුරුවරයෙක් වෙන්න. 

ඈත සීත රුසියාවේ සාර් පාලනය බිම දමා පාගමින්  ජනතාවගේ පාලනයක් පිහිටවූ කල , " අවූරෝරා"නෞකාවෙන් පිටවූ වෙඩි හඬේ ගැඹුර දරුවන්ට කියාදෙන අන්දමේ ගුරුවරයෙක් වෙන්න.එය විප්ලවයක් බවත් හුදෙක් බඩගින්නට පාන් ඉල්ලමින් කල සටනක් නොවන බවත් , උගන්වන පුලුවන් තරමේ ගුරුවරයෙක් වෙන්න.

ඇමෙරිකා එක්සත් ජනපදය යනූ සුද්දන්ගේ නිජබිමක් නොවන බවත් , බොහෝ කලකට ඉහත  , පරිසරයේ සුවඳ ජීවනාලිය වූ රතු පැහැති මිනිසූන් එහි වාසය කළ බව කියා  දෙන ගුරුවරයෙක් වෙන්න.  එක අතකින් බයිබලයද  , අනෙක් අතෙන් බයිනෙත්තුවද ගෙන ආ සූද්දන් , රතු මිනිසුන්ගේ අතීතය කීතූ කීතූ කළ අන්දම  උගන්වන ගුරුවරයෙක් වෙන්න.

රටවැසි පනතින් සහෝදර දමිළයන් , අන්රටක සිට පැමිණියාවුන් මෙන් සලකා දහඩිය දමමින් පිළිස්සෙන උතුරට , නැගෙනහිරට කොන් කොට මහා යුද්ධයකට ඇවිද ගිය ආකාරය හැඟිම්බර නොවී උගන්වන අන්දමේ ගුරුවරයෙක් වෙන්න. අන්ධකාරය රජ කෙරූ " කලූ ජූලියක "  මුල මැද අග සියල්ලම අපක්ෂපාතීව උගන්වන ගුරුවරයෙක් වෙන්න. ජාතියට , ආගමට , වර්ණයට ඉහළින් මනුෂ්‍යත්වයම පමණක් රජයන බව දරුවන්ට ඒත්තූ ගන්වන ගුරුවරයෙක් වෙන්න.

නීල් ආම්ස්ට්‍රෝන්ග් සහ කණ්ඩායම මංගල වතාවට සඳ තරණය කළ බවත් , එඩ්මන් හිලරි මුල්ම වරට එවරස්ට් තරණය කළ බවත් ,කැප්ටම් මැතිව් වෙබී ඉංග්‍රීසී ඕඩය හරහා පළමුවරට පිහිනූ බවත් , මහා බ්‍රිතාන්‍යේ රොජර් බැනින්ස්ටර් මිනිත්තූ හතරට පෙර හැතැම්මක් දුවා අවසන් කළ ලොව පළමුවැන්නා වූ බවත් දරුවන්ට කියාදෙන ගුරුවරයෙක් වෙන්න.

සිහින් සීතලක් තැවරුණූ , රහස් කප්පරක් සඟවන සුළඟත් , වසර දහස් ගණනක කතාන්දර දැන  දැක මුනිවත රකින වෘක්ෂලතාවත් , කඳු සිරසකින් පැන නැඟී , වක්කලම් ගැන්වී , පෙණ බුබුළු මවමින් ඇදෙනා ගංඟාවත් , අප ගන්නා හුස්ම මෙන්ම එක හා සමාන බව උගන්වන ගුරුවරයෙක් වෙන්න. 

 මට ඕන ඒ ජාතියේ ගුරුවරයෙක් වෙන්න.

මනුජය තෙන්නකෝන්.

ප:ලි :- ඡායාරූපය අන්තර්ජාලයන්

අසම්පූර්ණ කොස් මාමා

මායාවේ සහ ප්‍රෝඩාවේ කඩතුරාවෙන් වැසූන සැබෑ සත්‍යය කාලයේ ඉක්මවීම සමඟ අතිශයින්ම සාමාන්‍යකරණය වූ නිර්මිත සත්‍යයක් (කෲතිමව නිමැයූ) වීම පුදුම සහගතයි. පහත කතාන්දරය එවැනි කතාවක්.

 2006 අවුරුදදේ පාසල් පෙළපොතක ආතර් වින්ස්ටන් ඩයස් නොහොත් කොස් මාමා ගැන පාඩමක්ම වෙන්වෙලා තිබුනා

.ඔහූ  ජාතියට කොස් කවපු හැටි , කොස් ඇට පිනට දුන් හැටි ,කොස් මාමා  නම ලැබුන හැටි වගේම ඔහුගේ රුවෙන් මුද්දරයක් නිකුත් උන හැටිත් ආටෝප සාටෝප හල්කිරිම් මැදින් බොහෝම සරුවට ලියලා තිබුනා.

ආතර් වී ඩයස්ගේ මව සහ විශාඛාවිද්‍යාලයේ ප්‍රධාන ධානපතිනිය වූ සෙලෙස්තිනා ඩයස් මහත්මිය.

තමන් කොස් ගසට මෙතරම් ආදරය කරන්න පටන් ගත්තේ කොස් ලී පටවපූ කරත්තයක් දැකීමෙන් බවත් පෙළ පොතේ වැඩිදුරටත් සඳහන් වී තිබුනා.ඒත් මට පස්සේ දවසක හිතුනේ ආතර් වී ඩයස් දැක්ක කොස් ලී පටවපූ කරත්තය තමන්ගේම පියාගේ (P.ජෙරමියෙස් ඩයස් ) ලී මඩූවෙන් පටවපු කරත්තයක් වෙන්න ඇති කියලා . හේතුව ඒ වෙනකොට අරක්කූ රේන්ද ව්‍යාපාරේ සිලීමේ උන්නූ ඔහුගේ පියා එම ව්‍යාපාරවලට අමතරව ගස් කපා පැටවීමත් ව්‍යාපාරය ලෙස කරගෙන ගොස් තිබුනා. ඔහුට එකල සිටි ප්‍රධානතම තරගකරු වූනේ සේදවත්තේ විජේවර්ධන වලව්ව. ඒ ජයවර්ධන ජනාධිපතිගේ මව් පාර්ශවයේ ජේෂ්ඨයා උනූ තුඩුගලගේ දොන් පිලිප් විජේවර්ධන. 

 කොහොමින් කොහොම හරි 1902 අපේ කතානායක ආතර් වී ඩයස්ගේ පියා මිය යනවා. තම සැමියාගේ සියලූම ඉඩකඩම් සහ අරක්කූ රේන්ද ව්‍යාපාරය බිරිඳවූ සෙලෙස්තිනා ඩයස් තමන්ගේ අතට ගන්නවා. පානදුරේ ධනවත් රොද්‍රිගෝ පවුලෙන් පැමිණි ඈ ,තම දරුවන්ගේ සහයද ඇතුව ව්‍යාපාරය ගොඩනගනවා.  ඇය 1917 විශාකා  විද්‍යාලයට මුදල් ලබාදෙන්නේ ඇගේ මතුගම ඉඩමක් විකුණාදමමින් 

 . පසුකලක ඇය ආනන්ද විද්‍යාලයට නව විද්‍යාගාරයක් ලබාදෙනවා.අරක්කූ වෙළඳාමේ ලාභය ඈ නොමසුරුව බෞද්ධ පාසල් දියුණුවට වැය කරනවා. සේනානායක , ආටිගල , විජේවර්ධන වගේම ඩයස් පවුලත් අරක්කූ ව්‍යාපාරයෙන් ධනයෙන් ආඪ්‍ය වෙනවා.

"විශාකා විද්‍යාලයේ බිත්තී සීරු විට අරක්කූ සුවඳ දැනෙන බව "

කුමාරි ජයවර්ධන පවසන්නේ  සෙලෙස්තිනා ඩයස්ගේ බෞද්ධා කාන්තා පාසල් සහ ඇති සම්බන්ධය නිසාවෙනි.  

අපේ කතා නායක කොස් මාමා 1915 සිංහල-මරක්කල කෝලාහලය අවස්ථාවේ අත්අඩංගුවට පත්වෙනවා. මරණ දඬුවම නියමූ වූ මොහොතෙ සෙලෙස්තිනා ඩයස්ගේ මුදලට ස්තුතිවෙන්න ඔහූ වසරකින් නිදහස් වෙනවා. නැවතත් අරක්කූ රේන්ද මුදල් නිසාවෙන් 56 බණ්ඩාරනායකගේ විප්ලවය සමඟ ජාතිකවාදි දේශපාලනයක් කිරිමට ආතර් වී දියෙස් කෙනෙක් ඒ නිසා රටට ඉතිරිවනවා. ඔහූ නයිට් නම්බූ නාමය සහ සෙනට් මන්ත්‍රී ධූරය අතහැරියද දිගින් දිගටම මියෙන තුරු ජාතිකවාදි කඳවුරේම සිටිනවා. 

අද ජාතික වීරයෙක් ලෙස පවා හැඳින්වෙන ආතර් වී ඩයස්ගේ ජිවිතයේ බොහෝ කරුණු මෙලෙසින් කපා කොටා  නිශේදනය කොට සංශෝදනයෙන් පලකිරිම මා මුලින් කිව් ප්‍රෝඩාවනක් කාලයේ ඇවෑමෙන් සැබෑව වී සත්‍යය නොමැකී යාමේ ආසන්නතම උදාහරණයයි. ඔහූ කොස් පැළ බෙදා දීමේ ව්‍යාපාරය පමණක් කළ අයෙක් ලෙස හඳුන්වා දීම ඔහුටත් , ඉතිහාසය කියවන අපටත් , දෙපාර්ශවයටම සිදුවන අසාධාරණයකි.

සොඳුරු ට්‍රොස්කිවාදිනිය

තමන්ගේ මුලූ ජිවිතයම ට්‍රොස්කිවාදීනීයක්ව ජිවත් වූනූ කොළඹ සරසවියේ මහාචාර්‍ය පියසීලී විජේගුණසිංහ ගැන මම මුලින්ම කියෙව්වේ 2009 අවුරුද්දේ අගභාගයේ. විකොසේ ක්‍රියාත්මක වීම , විජේ ඩයස්ගේ නායකත්වය , කීර්ති බාලසූරියගේ චින්තනය සහ මහාචාර්‍ය ගම්ලත්ගේ මාක්ස්වාදී කලා විචාරය ගැන දිවයින බදාදා අතිරේකයෙන් මට යාන්තමින් අහන්න ලැබෙන අතරේ පියසීලී විජේගුණසිංහ නමත් ඇසී නොඇසී ගියා.

 හැබැයි ඒ වෙනකන් මට මහාචාර්‍ය විජේගුණසිංහගේ එකම ලිපියක්වත් කියවන්න ලැබී තිබුනේ නෑ. ඒත් සයිමන් නවගත්තේගමගේ සංසාරණ්‍යේ දඩයක්කාරයා කියවලා ඔලූව විකාරවෙලා ඉන්න මොහොතක, සයිමන්ගේ දඩයක්කාරයා පිළිබඳ පියසීලී විජේගුණසිංහගේ මාක්ස්වාදී විචාරයක් මට අහම්බෙන් කියවන්න ලැබුනා. ඇගේ ලිපියෙන් පස්සෙත් නවකතාව මම දෙවතාවක් විතර බොහෝම ප්‍රවේශමෙන් නැවත නැවත කියෙව්වා.ඈ ගැන ගෞරවාන්විත ප්‍රේමයක් ඇති උනා. 1995 ඈ විසින් ලිව් " සුචරිත ගම්ලත්ට එරෙහිව මාක්ස්වාදි කලා විචාරයේ මූලධර්ම" ඒ ආසන්න කාලයක කියවන්න ලැබුනා. ගම්ලත්ගේ මුල් කෘතිය නොකියවූවෙක් නිසා පියසීලී විජේගුණසිංහගේ මතුකිරීම මට තදින් වැටහුනේ නැහැ.

කොහොමින් කොහොමහරි පියසීලී විජේගුණසිංහ මියගිහින් පහුගිය දෙවෙනිදට වසර පහළොවක්.ඈ වැන්නකු කොළඹ විශ්ව විද්‍යාලයේ සිටී බවක්වත් , ඇගේ මතක සටහනක්වත් සරසවි භූමියේ තබා සිසූන් අතරවත් නැහැ. අඩූම කලා පිඨය තුළවත් ඒ පිළිබඳ කතිකාවතක් මට ඇසී පෙනී නැහැ. ඈ වැන්නවූන් තවදුරටත් විශ්වවිද්‍යාලයට අනවශ්‍යබව ඊටත් වඩා පිළිඹිබූවන අවස්ථාවක් තවත් නැහැ.

ඡායාරූපය : තරුණ පියසීලී විජේගුණසිංහ

මනුජය තෙන්නකෝන්

Pinkman ට 46 ක් !!!!

 Vince Gilligan ගේ Breaking Bad කතාමාලාව  මම මුලින්ම බලන්න පටන් අරගෙන කොටස් දෙකකට පස්සේ නවත්තලා දැම්මා. තවත් අවුරුදු තුනක් ගියා ඒ නවත්තපූ එක පටන් අරගෙන ඉවර කරන්න. දැන් මම  Breaking Bad ප්‍රේමියෙක්, හිතවතෙක් ඒවගේම සහෲදයෙක්.

Aaron Paul ,Breaking Bad හි ජෙසී පින්ක්මන් ලෙස

මට ඕනෑම ශානරයක කතාවක් බලන්න ටිකක් වෙලා යනවා. ඒ කාර්‍යබහූලත්වය නිසාම නෙවෙයි . කතාවක් ඇතුළේ කියවෙන හැම පොඩි දෙයක් ගැනම මම ටිකාක් වැඩිපූර අවධානය යොමූ කරන්න ආස නිසා . උදාහරණයකට  House of Cards බලන්න ගත්තම , එක්සත් ජනපදයේ කොන්ග්‍රසයේ හැසිරීම , සෙනට් මණ්ඩලයේ පත්වීම , නියෝජිත මන්ත්‍රී මණ්ඩලය ( House of Representative) පත්විමේ පටිපාටිය වගේ දේවල් සහ ඔවුන්ගේ ජනාධිපතිවරණයේ ඡන්ද විමසිමේ ක්‍රියාවලිය පවා ඉගෙන ගෙන තමා කතාමාලාව බලන්නේ. ඒක වෙහෙසකර ,කාලය මිඩංගු වෙන ඒත් විනෝදබර දෙයක්. 

ඒ හින්දම මට Breaking Bad සෑහෙන්නම ගැළපුන කතාවක්. තිරපිටපතේ ගලා යෑම , කුතුහලය විතරක් නෙවෙයි චරිතවල වෙනස්විම පවා සැහෙන්න තිගැස්මක් ඇතිකළා. කාලයක් X-Files රචකයෙක් උනූ Vince Gilligan ට ඒක අමුත්තක් වෙන්න විදියක් නෑ. ප්‍රධාන චරිත දෙක ඇතුළෙත් වෝල්ටර් වයිට් ඉස්මතු වෙන හැම තැනකදිම Pinkman Kid එහෙම නැත්නම් Jesse Bruce Pinkman  ගේ ඡායාව නොනැසී තිබුනා. සහායක චරිතයකට ප්‍රධාන කතා තේමාවට දෙන්න පුලුවන් දායකත්වයේ තරම Pinkman ගේ චරිතයෙන් පෙන්නුම් කරා. මතකනේ

House of Cards කතාමාලාව වෙනුවෙන් මා ලිවූ සටහන්

 "Yeah Mr.White !! Science "

කියන තරුණ Junkie ව. (මතට ලොල්වූවෙක්) 

Pinkman ගැන මගේ මිත්‍රයෙක් පස්සේ දවසක කතාබහක් ඇතුළේ හොඳ අර්ථ දැක්විමක් කරා.

" වෙන උන්ගේ මොළේ වැඩ කරලා , හරි තීන්දූ තීරණ ගන්න පුලුවන් වෙන්නේ උන් හොඳ සිහියෙන් ඉන්නකොට. හැබැයි Pinkman හරියට හිතලා වැඩ කරන්නේ Panic එකකදි."  

ඔහූ ඒකට උදාහරණයක් විදියට කීවේ  Walter White තමන්ගේ විද්‍යාගාර සහයක Gale Boetticher ඝාතනය කරන්න කියලා Pinkman ට කියන අවස්ථාව.කතාව ඉවර වෙනකොට මට Walter ට වඩා දැනූනේ Pinkman ව.  තමන්ගේ දක්ෂතාවය හැකියාව දෙමාපියන්ට ,ගුරුවරුන්ට පවා මඟඇරුනු , ආදරය මඟඇරුනූ , හුදකලාව ඉතිරි උනූ තරුණයෙක්ගේ ජිවිතේ ඉරණම වෙනස් වෙන විදිය Pinkman ගේ චරිතේ හරස්කඩක ලියවෙලා තියනවා. 

කොහොම හරි මුල් පිටපතට අනූව පළවෙනි කොටස් තුනෙන් ඉවත් කරන්න හිටපූ Jesee Pinkman චරිතය ,  අවසානයට ලෝක ටෙලි කතාමාලාවේ නොමැකෙන නමක් ඉතිරි කරා. ඊයේ අගෝස්තු 27 වෙන්දා Jesse Pinkman ගේ චරිතය නිරූපණය කරපූ Aaron paul ගේ 46 වෙනි උපන්දිනය. වෙන මොනවා කියන්නද ?? 

Happy birthday bitch !!!  නොකියා.